 មានលុយ មិនមែនមានន័យថា មានអ្វីៗគ្រប់យ៉ាង និង គួរឲ្យតម្លៃបំផុតនោះទេ តែអ្វីដែលអ្នកគួរឲ្យស្វែងយល់នោះគឺភាពជោគជ័យរបស់អ្នក។ ភាពជោគជ័យទាំងការសិក្សាក្តី ការងារក្តី ជិតគ្រួសារក្តីសុទ្ធតែក្តីប្រាថ្នារបស់មនុស្សគ្រប់រូប នោះហើយជាអ្វីដែលគេយល់ថា បើអ្នកជោគជ័យលើចំណុចទាំងនេះ អ្នកក៏កើតមាសកើតប្រាក់ទៅតាមនោះដែរ។ យ៉ាងណាមិញ អ្នកប្រហែលជាមានចំណុចជាច្រើនដែលអ្នកត្រូវធ្វើមុននឹងក្លាយជាអ្នកមានលទ្ធផលទាំងនេះដែលនោះគឺ៖ ១) កុំយកលុយធ្វើជាត្រីមុខ មនុស្សជាទូទៅចាត់ទុកថា ជាលុយគឺជារឿងសំខាន់។ យ៉ាងណាមិញ ការយកលុយធ្វើជារឿងត្រីមុខមិនមែនជាគន្លឹះធ្វើឲ្យអ្នកក្លាយជាអ្នកមានបានឡើយ។ ផ្ទុយទៅវិញ អ្វីដែលអ្នកត្រូវគិតនោះគឺថា ត្រូវផ្ដោតទៅលើអ្វីដែលធ្វើឲ្យអ្នកអាចក្លាយជាអ្នកមានបាន នោះមាន ជាអាទិ៍ ការពង្រឹងអាជីពការងាររបស់អ្នក ផ្ដោតលើយុទ្ធសាស្ត្រ ឬ គន្លឹះរកលុយឲ្យបានច្រើន កាពង្រីកទំនាក់ទំនង ការរៀនសូត្រ និង ដកស្រង់បទពិសោធន៍ថ្មីៗឲ្យកាន់តែច្រើន។ ២) ឈប់គិតរកលុយឲ្យបាន ១ សែនដុល្លារមកគិតសន្សំលុយឲ្យបាន១សែនដុល្លារ អ្នកប្រហែលជាស្ថិតនៅក្នុងស្ថានភាពបែបនេះដោយយល់ថា ត្រូវធ្វើយ៉ាងម៉េចរកលុយឲ្យបាន១ សែនដុល្លារ ឬ ១ លានដុល្លារជាដើម។ ប៉ុន្តែអ្វីដែលអ្នកមើលរំលងនោះគឺថា អ្នកភ្លេចគិតរឿងសន្សំលុយកាក់ទុកឲ្យបានច្រើន។ អ្នកប្រហែលជាមនុស្សម្នាក់ដែលអាចចាយវាយច្រើន មិនពូកែសន្សំប្រាក់ ឬ ជាអ្នកដែលពូកែតែរកលុយ តែមិនពូកែសន្សំ។ នេះជាគ្រោះថ្នាក់ធំបំផុត មួយត្បិតអីវិថីឆ្ពោះទៅកាន់អ្នកមាន គឺកើតចេញពីការសន្សំប្រាក់ទុក្ខឲ្យបានច្រើននេះឯង។ ៣) យល់ឲ្យច្បាស់ថារកលុយ ដើម្បីបង្កើតអ្វីផ្សេងទៀតឲ្យបានកាន់តែច្រើន “យើងមិនផលិតភាពយន្តដើម្បីរកប្រាក់ចំណូលនោះទេ យើងបង្កើតប្រាក់ចំណូលដើម្បីផលិតភាពយន្តបន្ថែម”។ Walt Disney ស្ថាបនិកក្រុមហ៊ុនកម្សាន្ត Walt Disney របស់អាមេរិក។ តាមប្រសាសន៍របស់លោក Walt Disney រឿងត្រឹមត្រូវតែមួយគត់ដែលអ្នកគួរយល់ឲ្យច្បាស់នៅទីនេះនោះគឺថា អ្នកត្រូវរកលុយ ដើម្បីយកទៅចំណាយសម្រាប់បង្កើតអ្វីផ្សេងឲ្យបានកាន់តែច្រើន។ បើនៅក្នុងទីលានអាជីវកម្ម អ្នកមិនអាចធ្វើអាជីវកម្មដើម្បីកើបប្រាក់ចំណេញតែមួយមុខពីការលក់ផលិតផល ឬ សេវាកម្មរបស់អ្នកនោះទេ។ នេះមានន័យថា អ្នកត្រូវចំណាយប្រាក់ធ្វើឲ្យផលិតផលរបស់អ្នកមានគុណភាពល្អ សេវាកម្មល្អ តម្លៃសមរម្យ និង ពង្រីកសេវាកម្ម ឬ ផលិតផលរបស់អ្នកឲ្យកាន់តែធំជាងមុន ដែលគេហៅថា យកលុយទៅវិនិយោគបន្ថែមនោះអី! ៤) ធ្វើរឿងមួយឲ្យបានល្អប្រសើរ និង មានជំនាញពិតប្រាកដ ពាក្យចាស់ពោលថា "ចាប់នេះចាប់នោះមិនច្បាស់ត្រង់ណា” ដែលសំដៅថា អ្នកមិនបានធ្វើអ្វីមួយជាដុំកំភួន មិនច្បាស់ជាធ្វើអ្វីមួយឲ្យពិតប្រាកដ បន្តិចធ្វើនេះ បន្តិចធ្វើនោះរកទីបញ្ចប់គ្មាន។ កម្មវត្ថុនៅក្នុងចំណុចនេះនោះគឺថា អ្នកត្រូវសម្រេចចិត្តជ្រើសរើសយកការងារមួយមកធ្វើឲ្យពិតប្រាកក្នុងលទ្ធផលមួយល្អប្រសើរ។ មហាសេដ្ឋី និង បុគ្គលជោគជ័យជាច្រើនចាប់អារម្មណ៍លើចំណុចនេះខ្លាំងណាស់ដើម្បីបង្កើតជាជំនាញផ្ទាល់ខ្លួនសម្រាប់ធ្វើជាថ្នាលជីវិតរបស់ពួកគេ។ បុគ្គលទាំងនេះបានខិតខំ ដុសខាត់ បំពាក់បំប៉នចំណេះដឹង រៀនសូត្រជាបន្តបន្ទាប់រហូតមានចំណេះអាជីពពិតប្រាកដដូចគេនិយាយថា "ចេះប្រាកដ ប្រាក់រត់តាមហៅ"។ នេះជាគន្លឹះរកប្រាក់ដែលអាចធ្វើឲ្យអ្នកក្លាយជាអ្នកមានបាន មិនមែនអាចធ្វើរឿងគ្រប់យ៉ាងក្នុងពេលតែមួយនោះឡើយ។ ៥) តាមដានសកម្មភាពអនុវត្តការងាររបស់អ្នកឲ្យបានញឹកញាប់ ការងារដែលអ្នកធ្វើប្រចាំថ្ងៃ វាមិនមែនសុទ្ធតែជោគជ័យតាមអ្វីដែលអ្នកគ្រោងទុកនោះឡើយ ពោលគឺវានៅមានភាពខ្វះចន្លោះប្រហោងដែលទាមទារឲ្យអ្នកធ្វើការត្រួតពិនិត្យ និង វាយតម្លៃឲ្យបានញឹកញាប់។ នៅរៀងរាល់ចុងសបា្តហ៍ យ៉ាងហោចណាស់ អ្នកត្រូវដើរតួជាអ្នកដឹកនាំអនុវត្តផង និង ជាអ្នកត្រួតពិនិត្យផងដែលមានដូចជា តើអ្នកការងាររបស់អ្នកបានជោគជ័យដល់កម្រិតណា? តើអ្វីទៅជាឧបសគ្គដែលមិនអាចធ្វើឲ្យអ្នកជោគជ័យក្នុងសបា្តហ៍នេះ? តើអ្វីទៅជាដំណោះស្រាយបង្ហាទាំងនោះ? តើមានវិធីសាស្ត្រផ្សេងដែលធ្វើឲ្យអ្នករកលុយបានច្រើនជាងនេះដែរឬទេ? ការសាកសួរសំនួរទាំងនេះនឹងធ្វើឲ្យអ្នករកឃើញពីភាពខ្សោយរបស់អ្នក សំដៅជំរុញឲ្យការងារទទួលបានលទ្ធផលល្អប្រសើរនៅពេលក្រោយ។ ប្រែសម្រួល៖ ខេវិន ប្រភព៖ Lifehack thebnews.com
Subscribe to:
Post Comments (Atom)
0 comments:
Post a Comment